ليس في الإمكان أبدع من هذا العالم

2023-04-18 · philosophy

الإمام الغزالي قال: "ليس في الإمكان أبدع من هذا العالم." ودي بالنسبالي حاجة مثيرة للتعجب أنك تفكر أن عالمنا ده، بكل بشاعته، هو أفضل حاجة ممكنة كان الله -سبحانه وتعالى- ممكن يخلقها. هل فيه عجز ما من الله بناء على هذا الأساس؟ هل قدرة الله فيها شيء من المحدودية عشان تخلق عالم من وجهة نظرنا فيه كل الأخطاء دي؟

الكليشيه هنا هيبقى أني أقول أني دي مش أخطاء بل هي أخطاء في نظرنا المحدود ومن خلال ده هي مثاليات احنا مش فاهمين حكمتها، وده اللي كل الناس عارفاه ومش هبقى بقول جديد لو قلته.

بدل ده عايز أتكلم عن يعني ايه اختيار من الله، يعني ايه أن الله يختار؟ هل كان فيه احتمالات كتير للعالم والله اختار العالم ده منها؟ حاش لله. جملة تبان مثيرة للجدل هنا وهي أن الله ليس بمختار ولكن بمريد، ابن عربي اتكلم عن أن الله ليس عنده "ممكنات" بل أن كل شيء واجب لأن الله هو من أوجد كل شيء، فلو كان هناك ممكن ده معناه أن هل مثلا ربنا عمله وبعد كدة غير رأيه؟

مستحيل، الحاجة اللي اتعملت قيل لها كن فكانت، هي مطلقة وواجبة فهو المختار الذي لا يختار، فالوجود ليس فيه "ممكنات."

بالتالي، لما نقول "ليس في الإمكان أبدع من هذا العالم." هيبقى مش قصدنا أن فيه احتمالات تانية ربنا اختار منها، هيبقى قصدنا أن مفيش حاجة اسمها احتمال أصلا، هو مكنش فيه غير الخيار ده في العين الإلهية.

فليس هناك إلا الوجود الواجب لله. والله أعلم.
كل سنة وأنتوا طيبين.