ظاهرة الـLiterally Me
مثير للاهتمام حاجة ظهرت آخر كام سنة، بس واضحة بشكل عالي السنادي هي ظاهرة الـ Literally Me و الـ Sigma Male خصوصا بين الشباب اللي في سني والفئة اللي فوقينا حبتين.
الظاهرة دي بتضمن شعور بالانتماء لشخصية ما هي إلا مجرد سايكوباتي طايح في الناس أو شخص روش لابس نضارة شمس ماشي يجلد في الستات (كينج وليترلي مي).
باتريك بايتمان من American Psycho.
ريان جوزلينج في أي فيلم ليه بس تحديدا Blade Runner.
الجوكر بكل نسخه بس تحديدا خواكين فينكس.
وآخر مستجد للشلة هوملاندر من The Boys.
العامل المشترك بين كل الناس هو شعورهم بالفوقية وتميزهم عن شخصية البطل المعتاد اللي هدفه يساعد الناس، السكيزوفرينيا هنا مش مرض نفسي لأ دي ميزة والناس بقت بيتقال عليها سكيزوفرينيك كنوع من أنواع الهبات، هنا اغلب الناس دي ناس كارهة المجتمع وماشيين ضرب وقتل واغتصاب وكل ما هو منافي لشخصيات الناس اللي بتقول عليهم ليترلي مي، أقصد هما في الغالب مش هيقتلوا حد لما يشوفوه في الحقيقة يعني أو يـ go on a killing rampage لو جتلهم الفرصة، صح؟
مش عارف، الواضح أن الجيل ده، مش كله، بس جزء كبير منه كاره لذاته وكاره للمجتمع، ولأن كلنا مربوطين بحبال "احنا عايشين في مجتمع" والقانون والدول ده مخلّي كل الناس مش قادرة غير أنها تبص بإعجاب وتقدير لباتريك بايتمان وهو بيطلق العنان لكل الجنون اللي جواه.
لما باجي اتفرج على اي نوع من الأفلام دي وتصيبني حالة مقارنة نفسي بالبطل وكنت هعمل زيه كدة امتى وفين، لا أنفك إني أتسائل عن حالتي العقلية، وعن حالة كل الجيل اللي أتولد في سلام مبالغ فيه، منتظر أنه يفرّغ الفوضى اللي جواه في فيلم سايكوتيك عن بطل مجنون بتتمنى أنك تعيش حياته.
