هل أنا قلتلك قبل كدة إني عايز فلوس؟

2023-04-24 · essays

هل أنا قلتلك قبل كدة إني عايز فلوس؟ مين مش عايز؟ ايوا، مش معنى إني واعي وذكي وبائس وكل الكلام ده إني مش بحتاج إني آكل واشرب والبس في بعض الأحيان اللي بقرر أخرج فيها، الوعي مش ببلاش يا عزيزي. بس ايه مقدار الأموال اللي الشخص بيحتاجه؟ في عصرنا ده، المغريات في كل مكان، لو نزلت مول أو سوبرماركت، هتلاقي كل أنواع المأكولات، الذي تشتهيه والذي لا تريده أن يقرب أنفك، هتلاقي كل أنواع الملابس اللي نفسك فيها والحاجات التانية اللي أنت عارف أن الناس بتقول عليها 'فلاحي'، هنتكلم عن اللفظ ده قدام شوية، أصبر عليا. هتلاقي حتى حاجات بتصحي روح الطفل اللي قدامك زي الالعاب والبلايستيشن وغيره. ملخصا، هتلاقي جنة على الأرض.

جنة محتاجة عملة مش نادرة. أحيانا لما بمسك فلوس، مهما كانت الكمية، بستغرب بشدة من حجم وشكل وقيمة الورقة دي. ايوا، دي مجرد ورقة، زيها زي ورقة الامتحان اللي بتحدد مصيرك زيها زي الورق الحكومي اللي بيحدد وجودك أصلا زي شهادة الميلاد. كل الحاجات دي سوا، كل الورق ده قيمته احنا ادينهاله، هي العامل المتحكم في الشبكة الاجتماعية واللي مشغلها وممشيها. في عصر احنا فاكرين فيه أن العلم هو اللي بيتحكم في العناصر الثابتة للكون، وبيُملي علينا قواعد مطلقة زي قانون التكافؤ أو ٢+٢=٤، الورق ده احنا اديناله قيمة موضعية، قيمة احنا عملناها وفي اي وقت ممكن نشيلها. بتبص للعملة أو لورقة الامتحان لوهلة وتستغرب، ازاي الورقة دي متحكمة في مصيري، ورغباتي، وحياتي، والحاجات اللي بفكر فيها! الورقة دي متحكمة في وجودك! لو معكش من الورقة دي أنت عضو ملكش قيمة في الشبكة الاجتماعية. الورقة اتحولت من حاجة احنا بنديها معنى لحاجة هي اللي بتدينا معنى. بقينا احنا اللي محتاجين الورقة دي عشان نعيش والناس بتتعامل بيها وعشانها على هذا الأساس.

ولو سألتني، برغم كل العيوب دي، أنت بتحب الفلوس؟ هقولك بحبها حبا جما! فـ في وسط كل معاناتي، الأكل والشرب واللبس والبزخ هو اللي ممكن يخفف عني، والفقر يزودلي من معاناتي. أنا مش غني تحت اي تعريف بل كنت في فترة طويلة من حياتي عايش في ظلال الفقر القاحط لكن برغم ده اتعلمت احب الفلوس واقدرها، واحب اللي يحب الفلوس واقدره. الشخص اللي عايش عشان الفلوس شخص عملي، شخص فاهم الكون ماشي ازاي وفاهم وعارف وعايز يوصل لمكانة أعلى في الشبكة الاجتماعية وهو مش شرط يكون واعي بالمناسبة، هو ممكن يكون شخص عادي بس عنده الوعي المادي، اللي حاجة مش عندي بالمناسبة! أنا سفيه جدا ماديا وممكن اصرف مرتبي كله في أسبوع واعيش باقي الشهر مش لاقي آكل واندم على افعالي وبالمناسبة مش شرط اكون مستمتع خلال هذا الأسبوع، بس أهو أي حاجة تخفف آلامي.

Notes from the underground