الهوس، والولد اللي قاعد جنب التلاجة
الهوس (obsession) في رأيي لطالما كان المحرك الأول للانجازات في تاريخ البشرية، الشغف ممكن والdiscipline ضروري، لكن اللحظات اللي بتدخلك لل flow state هي لحظات الهوس، ساعات من حل مسائل أو ساعات من الرسم أو الكتابة أو debugging code لما دماغك يجيب آخره بس أنت مش هتقوم غير لما توصل لحاجة معينة. عارف الشعور ده؟ اسهل تصوير فني لده هو طبعا فيلم Whiplash.
أنا عارفه كويس. أول هوس ليا كان مجموعة روايات (Light Novels) لأنيمي Sword Art Online. أنا لسه فاكر الولد اللي في تالتة اعدادي اللي حاطط التيلفون في الشاحن وقاعد على كرسي جنب التلاجة بيقرا بقاله اكتر من تمن ساعات بدون توقف الساعة 8 الصبح. الارادة والرغبة والانغماس اللي كنت حاسس بيهم ساعتها لسه بقدر استرجعهم لحد دلوقتي.
ده كان أول هوس ليا. ومن بعدها الهوس لم يتوقف. الهوس بكونسبت ما هيعرف ويحدد مسار الكذا شهر الجايين في حياتي، شوية تبقى كتب معينة أو أنيميات، أو بحاجة قابلتها وأنا بذاكر أو بمفهوم فلسفي أو بحاجة عن نفسي.
الهوس هو اسمى الوان ال pattern recognition، الحاجة اللي انا بعتبرها اقوى قدرات الانسان العقلية.
امبارح، 7 نوفمبر 2024 بيمثل الحدث اللي جوا الchronology بتاعة Sword Art Online نهاية أحداث القصة (تقريبا)، تلات أيام بس بعد عيد ميلادي اللي تميت فيه ال22، دي لحظة مهمة بالنسبالي. لحظة أنا فاكر أن الولد اللي قاعد على الكرسي في تالتة اعدادي كان مستنيها، وقريب أوي من وقت تخرجي. فترة انتقالية بمعنى الكلمة في حياتي.
أحب أشكر الولد ده على هوسه وأعرفه أني لا أزال مهووس والهوس بيزداد كل سنة. أقدر أقوله إن الهوس هو المحرك اللي بيدفعني للأمام، واللي بيخلق خط زمني لكل خطوة باخدها في حياتي. زي ما الهوس بيفتحلي أبواب لعوالم جديدة، فهو كمان بيعرّفني على نفسي أكتر. وللولد اللي بدأ كل ده، واللي كان مستعد يقعد ساعات قدام شاشة أو على كرسى جنب تلاجة، أقول له: شكراً. شغفك اللي استمر هو اللي رسم معالم رحلتي، وخطط مسار مستقبلي. ودي بداية جديدة لنسخة مني، نسخة بتاخد الهوس كدليل وتخطو نحو أحلام أكبر، وكل ما أزيد سنة، الهوس بيزيد، والمستقبل بيبان واضح أكتر.
