أغنية "سلام" والإنسان الفاشل المعاصر
2023-05-04 · film-tv
أغنية "سلام" لموسى سام أكتر أغنية بتمثل حالة الإنسان الفاشل المعاصر، ومن أكتر أغانيا المفضلة. الأغنية بتبدأ بموسى وهو ببوصف حالة العالم:
أنا عايش جوا عالم مليان حاجات غلط
فمتقوليش إنت هايف عشان عايز إقصاء
قاعد، مختلف مع نفسي
شادد أجزائي، معيش تفسير
حابس أنفاسي، بسيح وقتي
تعالى وإصلبني لإني مسيح وقتي
(تعبير واضح عن الـ Messiah Complex اللي عند الإنسان الفاشل الذكي، ودي من أكتر الحاجات المنتشرة اليومين دول.)
حبس نفسه جوا سجن وخايف يطلع منه
قتل نفسه بقوة بسن، السن ده كان جسمه
لأن مفيش سنس في العالم، مفيش أي منطق
مفيش سم في لجامك فمتختلقش الـ Concept
(السجن اللي بيتحط فيه الإنسان الفاشل، سجن بيصنعه لنفسه بعدم قدرته على المحاولة، في جحيم دانتي أليجيري، خطيئة الكسل كانت هي خطيئة الاكتئاب في ذات الوقت، عدم القدرة على المحاولة خطية تستحق النيران من وجهة نظر إله دانتي.)
أنا محتاج أموت مؤقتا على الأقل
السواد جوا جسمي مصفداً بالفشل
عقلي تالف، عقدي فاسخ، مفعماً بالأمل
(الإنسان الفاشل الذكي عنده أمل في البشرية، شايف كل قدراتها على إثبات وجودها، وعلى السيطرة على العالم، بس مش شايف أي أمل في ذاته. التناقض الواضح ده جاي من الاكتئاب والصعوبات اللي خلقها موسى لنفسه، اللي سببها ذاته.)
أعباء بتتقال عليا
أوثان بتتقاتل حواليا
ألوان بتتاكل
كان عندي إله بس إتاخد
جوايا إجابات بس تاهت
عنيا سواد بس داخت
في لساني أوزان أنا تافف
في وداني شيطان بيتشاهد
(كان عندي إله بس اتاخد، لما الشخص بيوصل لمرحلة معينة من الاكتئاب والفشل، بيبدأ يفقد الأمل في الإله ووجوده، في سماعه ليه، وفي استجابته، عشان كدة موسى مستسلم تماما لشيطانه، وده مش معناه أنه شرط أنه بيعمل حاجات غلط، بس الاستسلام المطلق والتخلي عن الإله بيوصلك لمرحلة أنك بتعتقد أنك عملت عقد ما مع الشيطان، وتعبير أن الشيطان بيتشاهد يدل على أنه مفقدش إيمانه بالكامل، ولسه عنده الرغبة الميتافيزيقية أن ربنا يرد عليه.)
مفيش صدف، وأنا بتصفد بقولهالك لازم تفهم
أنا سوء وصف للإله عشان بفطس من شكل السبحة
شايف أنبيا بتتشنق وملايكة بتموت من الخوف
في أوعية بتتملئ وبتفضى بدون ما بتعمل صوت
حاسس بالندم، أنا حاسب الأذى اللي هاخده وبس
كاتم الأسف، أنا خاضع للأسف بتنفس نزف
عقلي تايه في الخيال، جسمي متقطع بأمواس
(نفس التشبيه مرة تانية، مع مبالغات شديدة زي الانبياء اللي بتتشنق، تعبير عن رعبه الديني والدنيوي، وهو مش شايف غير قدرته على إيذاء نفسه اللي هو بيعمله.)
آسف طولت عليك، كفاية لحد كده كلام
الجنة مش هتسيعني طول ما جوا جسمي كثف سواد
لو بتسألني هعمل كده ليه، جلداً عشان أخد ثواب
كل اللي فات من وحي عقلي إنما اللي جاي بجد، سلام
(مرة تانية، بيتكلم عن استسلامه لدرجة أنه مقتنع أن الجنة مش ليه من كتر ما هو شخص مش كويس، وبتنتهي الأغنية بانتحاره بعد ما ضرب نفسه بالنار لما قال إن كل اللي فات من وحي عقله بس اللي جاي - انتحاره - ده الحقيقة الوحيدة والـ catharsis الأبدي.)
سلام تعبير واضح الحالة اللي ممكن يوصلها الشاب المعاصر في القرن الواحد والعشرين، من أفكار انتحارية، تعبيرات إلحادية، وأذى للذات، تحذير واضح من موسى أن محدش لازم يوصل للي هو وصله. الكسل وعدم القدرة على العمل هي أكبر خطيئة، لأنها بتدمر ego الشخص الذكي وبتوصله لمراحل محدش كان متصورها من اللي حواليه.
Special thanks for Ahmed Gamal Eltokhy for introducing me to the song years ago.
