مدرسة أثينا

2023-01-25 · essays

أعظم الأعمال الفنية على الإطلاق، مدرسة آثينا أو School of Athens لرفاييل. اللوحة دي بالنسبالي بتمثل كل ما هو عظيم في الاكاديميا البشرية، بيجمع فيها رفاييل كل اللي أثروا في تاريخ العلم والفلسفة حتى عصر النهضة اللي هو فيه.

في اللوحة دي على عكس الأسلوب المتبع وقتها من رص الفلاسفة جنب بعض وخلاص احنا هنا شايفين الفلسفة بيتم ممارستها بشكل حركي ومتمازج، كلهم بيتناقشوا ويتجادلوا في شكل مخليك مش حاسس إلا بالحركة في اللوحة.

على سبيل المثال، في مركز اللوحة، أرسطو وأفلاطون نفسهم. أفلاطون العجوز مدرس أرسطو على الشمال، ماسك أهم كتبه، ال Timaeus، وفيه أفلاطون كان دايما مهتم بالميتافيزيقي، بالنظري واللامحسوس، بالحقيقة المطلقة اللي احنا مش شايفينها في حياتنا الاعتيادية، عشان كدة بيشاور لفوق.

بينما أرسطو على اليمين ماسك أهم كتبه برده، الأخلاق النيقوماخية، وعلى عكس مدرسه، أرسطو مهتم بالأرضي، بالمنطق والعلم، بالمحسوس ودراسته، وشايف أن الحقيقة المطلقة هتبقى هنا.

عبقرية الاتنين بتتمثل حتى في لبسهم؛ أرسطو لابس أزرق وبني، لونين المياه والأرض، الاتنين ليهم وزن وأرضيين. بينما أفلاطون بنفسجي وأحمر، لون النار والهوا (أو الايثر وقتها) معدومي الوزن والفضائيين.

التقسيمة دي بتستمر، كل الفلاسفة والرياضيين اللي في جانب أفلاطون كانوا زيه، مهتمين بالميتافيزيقي والعقلي، بالمثالي؛ مثلا تحت على الشمال لابس وردي فيثاغورس، الرياضي العظيم اللي كان مهتم بالموسيقى والجمال، وبيبص عليه ابن رشد بالزيتي وشنبه الواضح وراه، الفيلسوف العربي اللي كان مهتم بالخيال.

الناحية التانية عند أرسطو هتلاقي إقليدس، الرياضي المهتم بالهندسة، بيرسم شكل هندسي والتلاميذ بيتعلموا منه، اهتمام واضح بكل ما هو عملي وحقيقي، مع اختلاف تعبيرات كل التلاميذ اللي حواليه.

مش بس البشر هما اللي بيمثلوا الانقسام الواضح، تمثايل الآلهة الرومانية اللي فوق، في جانب أفلاطون نقدر نشوف أبوللو، إله الموسيقى والشعر بينما عند أرسطو نشوف أثينا، إلهة الحرب والحكمة اللي كانت مهتمة أكتر بشئون البشر العملية.

اللوحة الحركية عاملة زي مشهد تقدر تشوفه في أي جامعة في وقت الامتحانات، ناس بتشرح وناس بتكتب وناس بتفكر وناس بتنقل، متقسمين لمجاميع مختلفين في التخصصات والاهتمامات والأشكال والبلدان والآراء...وكل حاجة!