إذن السفر
امبارح حصلي أكتر موقف بيثبتلي أن البلد دي هتفضل عايشة في الپيروقراطية العمياء للأبد، لأ ومش مصالح حكومية، أعتقد كلنا تخطينا المرحلة دي وبقت أمر واقع خلاص.
أنا كان المفترض اسافر أمريكا خمس أيام، عشان أقدم بحث ليا أتقبل في المؤتمر الدولي لأبحاث الطلبة، بقالي أكتر من سنة شغال عليه عن فلسفة الكندي وفلسفة الرياضيات. خدت دعم مادي من الجامعة، حجزت الطيارة، سجلت في المؤتمر، حجزت الفندق، خدت الفيزا وبهدلتها، عملت كل حاجة.
وصلت المطار ومستعد خلاص عشان أسافر، وعند كل بوابة بيسألوني "معاك أذن سفر؟" وأرد بكل سذاجة، "آه معايا." في اعتقادي أن إذن السفر ده هو الفيزا. لغاية ما وصلت لآخر بوابة ولقيت نفسي بتسأل نفس السؤال وبيقولي وريني إذن السفر، قلتله الفيزا؟ قالي لأ دي ورقة بتثبت أنك لسه طالب وبتدرس وتجنيدك متأجل، قلتله بسيطة أنا مطلع Military Status Letter من الجامعة بتثبت الكلام ده ومكتوب فيها أن تجنيدي متأجل لـ٢٠٢٨. قالي لأ مفيش حاجة اسمها كدة دي ورقة كدة لازم تجيبها من مكتب المش عارف ايه في العباسية روح هاتها.
قلتله اجيبها فين حضرتك الطيارة كمان ساعة قالي لأ هاتها. عملت سيرش وعرفت أنها ممكن تطلع اونلاين في ساعتها وقلته هعملها قالي لأ "مفيش الكلام ده لازم الورقة آجل الرحلة" ولقيتهم خدوني ورموني برا مطار القاهرة.
أنا مش فاهم ايه اللي حصل ده وليه مجهودي وفلوسي وكل حاجة تضيع بسبب ورقة! والأعجب من ده إني وأنا بعمل الباسبور جبتلهم ورقة بتثبت أن جيشي متأجل وبدرس، وشافوا نفس الورقة في السفارة وأنا بعمل الفيزا. يعني البروسيس دي تمت قبل كدة مرتين.
وهنرجع تاني نقول، طول ما احنا ماسكين في كلمة هاتلي الورقة وعايزين في جو العصر العباسي/ة (pun intended) ده مش هنخرج من البلاوي واللي احنا فيه، وأهل العلم هيفضلوا يسبوا ويلعنوا بسبب اللي اللي يحصل فيهم. وراح المؤتمر.
أنا بكتب البوست ده وأنا حالتي ما يعلم بيها إلا ربنا، كلّي يأس وأسى وحزن.
وحسبي الله ونعم الوكيل.