الناس الواعية والناس العادية

2023-04-20 · essays

بدون أي إهانة، طول عمري كنت شايف أن فيه نوعين من الناس، وكنت بتريق مع أصحابي دايما على النوع التاني كما لو كنا شايفين نفسنا طبقة أرقى فكريا في المجتمع، النوعين هما الناس الواعية والناس "العادية."

الناس الواعية هما الجامدين اللي زيي، اللي مش عارفين يعملوا حاجة في حياتهم عشان قاعدين يعيطوا انهم مش أقوى من قوانين الطبيعة، وتلاقي نفسك عمال تلف في اكتئابك، وتلوم الكون، وتلوم الطبيعة، وتلوم الظروف، وتلوم العجز، وتلوم ربنا أحيانا ليه لأ؟ ما أنت الذكي الواعي، اللي شايف كل الأسباب الرئيسية للمشاكل، اللي مقتنع أنه لو بقى رئيس دولة هيحل كل مشاكلها، لأ ثانية، أنا غبي أكيد الموضوع معقد أكتر من كدة وأكيد حكم دولة هياخد مجهود أكبر من ده، بس ادراكي ده هو اللي مخليني واعي، هو اللي مخليني مميز ومختلف عن الناس العادية.

الناس العادية اللي مش شايفين إلا الأسباب الثانوية، وده مخليهم قادرين يشتغلوا ويبقوا عمليين وينجحوا في حياتهم، طبعا، ما هم معندهمش مشاكل في دماغهم زيي، مش شايفين الصورة الكبيرة الإلهية اللي أنا شايفها، ولو قروا البوست ده مش هيفهموا انه كره ذاتي قوي من الطراز الأول وهيفتكروا أني مغرور، آه أنا مغرور بس مش بسبب البوست ده وليه الشك؟

أنا مبذاكرش ومبعملش حاجة في حياتي عشان أنا أذكى، آه أنا أذكى، ده السبب اللي مخليني طول حياتي مش عارف أبدأ أو أنهي أي حاجة من ساعة ما بقيت واعي ومدرك، على عكس الناس العادية الشغالة.

يا رتني كنت كسول ياخي، آه والله أنا لو كنت كسول على الأقل كان بقى فيه صفة أقدر أصف بيها نفسي، أبقى فاهم بيها نفسي، لما الناس تشاور أقولهم يا ديني ده أنا الكسول. بس مش عارف أنا مين. من كتر أفكاري وشخصياتي فقدت معنى الذات. آه فقدتها من زمان. معدتش عارف أنا مين ولا بعمل ايه، بقيت بخاف لما بسمع اسمي وبفتكرهم بيتكلموا على حد تاني.

يا حظ الانسان العادي، ويا حظك ياللي بتقرا البوست وفاكر نفسك زيي، أنا مفيش حد عانى معاناتي، ومفيش حد آسى زيي.

ومفيش غير منفذ واحد من قوانين الطبيعة، وهو أني أفضل اخبط ايدي في دماغي في الحمام زي ما بعمل كل يوم، بلعن وجودي، وبسأل أنا هنا ليه، عشان في النهاية أفهم أي حاجة، عكسك يا إنسان يا عادي.

وطبيعي أني بعد كل ده محترمش نفسي، هل فيه إنسان عنده ذرة وعي المفترض يبقى عنده أي احترام لذاته؟

Notes From the Underground